ක්රිකට් ක්රීඩාවකි. ඒත් ඉන්දියාවේ නම් එය ආගමකි. එංගලන්තයේ ඉපදවූ ක්රිකට්වලට ඉන්දියාවේදී වැඳුම් පිදුම් පවා ලැබේ. ඒ ක්රීඩකයන්ට දෙවියන්ට මෙන් සැලකිලි ලැබෙයි. ඉන්දියාවේ තරම් ක්රිකට් ජනප්රිය කළ හැකි වෙන කිසිදු රටක් මේ ලෝකයේ නැත. ඒ සඳහා හොඳම උදාහරණය අයි. පී. එල්. ය. අයිපීඑල්වලට සල්ලි ගංගා ගලා එති. සල්ලිවලින් නෑවෙන්නට අකැමැත්තෝ මේ ලොවේ නොවෙති. ඒ නිසා අයිපීඑල්වලට ලොව සතර දිග්භාගයේම වැඩකාරයෝ වෙති. ධනපතියෝ ඔවුන් කැඳවති.
එසේම අයිපීඑල් ක්රිකට් චමත්කාරජනකය. එහි අමුතු ආකර්ෂණයක් ඇත්තේය. විවිධ රටවල ක්රීඩකයෝ එකට එකතුව ක්රීඩා කරති, මවුබිමේ සහෝදර ක්රීඩකයන් පරාද කිරීමට වෙන රටවල ක්රීඩකයන් සමග කුමන්ත්රණ කරති. ජාති කිහිපයක සංකලනයන් එහි ඇත්තේය. ඒ අයිපීඑල් හි ඇති පෙනෙන වාසීන්ය. ඒත් එහි නොපෙනෙන වාසි හැම එකක්ම ඉන්දියාවටය. අලුත් ක්රීඩකයන් බිහි වන්නේ ඉන්දියාවටය. වැඩිලාභයද ඉන්දියාවට මිස ලංකාවට හෝ වෙනත් රටකට නොවේ.
අයිපීඑල් තරගාවලියට මෙවරද ශ්රී ලංකා ක්රීඩකයෝ දස දෙනෙක් පමණ නියෝජනය කරති. ඒ අතරින් මහේලට සහ සංගක්කාරට කණ්ඩායම් දෙකක නායකත්වයද භාරදී ශ්රී ලංකාවට තවත් ගෞරවයක් එක්කර දී ඇත. එහෙත් ශ්රී ලංකා ක්රිකට් ආයතනය පවසන පරිදි නම් ඒ ගෞරවය තවත් දින කිහිපයකට සීමාවේ. මන්ද මැයි මස 05 වැනිදාට පෙර ඒ සියලුම ක්රීඩකයන්ට ශ්රී ලංකාවට පැමිණෙන ලෙස දන්වා තිබීමයි.
ඒ එළැඹෙන එංගලන්ත සංචාරය හේතුවෙනි. ඒ සඳහා නව නායකයකු ද පත්කර තිබේ. ඒ තිලකරත්න ඩිල්ෂාන්ය. සංගක්කාරගේ ඉවත්වීමෙන් හිස්වුණු නායකත්වය ඩිල්ෂාන්ට හිමිවීම අරුමයක් නොවේ. මහේල ද එය ප්රතික්ෂේප කරන කල්හි ඩිල්ෂාන් හැරෙන්නට සුදුස්සකු කණ්ඩායම තුළ නැත. එහෙත් ඩිල්ෂාන්ට ඒ නායකත්වය අභියෝගයක් වීම වැළැක්විය නොහැක. එංගලන්ත සංචාරය ඔහුට ප්රබල අභියෝගයක් වනු ඇත. ඔහුට නායකත්වයේ පළමු පාඩම ක්රිකට් උපන් දේශයෙන්ම ලැබීමද එක්තරා අතකට හොඳ දෙයකි.
එහෙත් ඉන්දියාවෙන් ලැබෙන ආරංචි අනුව නම් අයිපීඑල් ගිය ඇතැම් ශ්රී ලංකා ක්රීඩකයන් එංගලන්ත සංචාරයට එතරම් සූදානමක් නැති බව පැවැසේ.
